Translate: កាលពីវេលាម៉ោង ០៩:០០ នាទីព្រឹក ថ្ងៃសុក្រ ទី១៦ ខែមករា ឆ្នាំ២០១៥ នៅទីស្តីការក្រសួងប្រៃសណីយ៍ និងទូរគមនាគមន៍ មានពិធីប្រកាសផ្ទេរ និងចូលកាន់តំណែងទីប្រឹក្សា ជំនួយការ ប្រធាន និងអនុប្រធាននាយកដ្ឋាន ក្រោមអធិបតីភាពដ៏ខ្ពង់ខ្ពស់ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងមានការអញ្ជើញចូលរួមជាកិត្តិយសពីសំណាក់ឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ អគ្គនាយក ព្រមទាំងលោក លោកស្រីជាមន្ត្រីនៃក្រសួងប្រៃសណីយ៍ និងទូរគមនាគមន៍ជាច្រើនរូបទៀត។
ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ មានមតិសំណេះសំណាលទៅកាន់អង្គពិធីទាំងមូលថា ក្រសួងប្រៃសណីយ៍ និងទូរគមនាគមន៍ នៅក្នុងរាជរដ្ឋាភិបាលអាណត្តិថ្មីនេះ បានចាត់ទុកការគ្រប់គ្រង និងអភិវឌ្ឍធនធានមនុស្ស គឺជាអាទិភាពចម្បងមួយក្នុងចំណោមអាទិភាពចម្បងៗ ជាច្រើនផ្សេងទៀត។ ការផ្ទេរ និងតែងតាំងមន្ត្រីក្រោមឱវាទក្រសួង ត្រូវបានរៀបចំឡើងចំនួន ២ លើករួចមកហើយ។ លើកទីមួយត្រូវបានធ្វើឡើងកាលពីខែកុម្ភៈ ឆ្នាំ២០១៤ ដែលមានមន្ត្រីចំនួន ៧៣ នាក់ត្រូវបានផ្ទេរ និងចូលកាន់តំណែងថ្មី និងលើកទី២ គឺនៅថ្ងៃទី១៦ ខែមករា ឆ្នាំ២០១៥នេះ ដែលមានមន្ត្រីចំនួន ១៩ នាក់ត្រូវបានផ្ទេរ និងចូលកាន់តំណែងថ្មី។
ឯកឧត្តមរដ្ឋមន្ត្រីក្រសួងប្រៃសណីយ៍ និងទូរគមនាគមន៍ មានប្រសាសន៍ឲ្យដឹងថា គុណសម្បត្តិធំៗ ២ យ៉ាងដែលត្រូវបានប្រើសម្រាប់វាយតម្លៃមន្ត្រីរាជការមុននឹងមានការតែងតាំង និងប្រគល់ភារកិច្ច គឺ សមត្ថភាព និងឥរិយាបថល្អក្នុងការបំពេញការងារ។ ជាមួយនេះ ឯកឧត្តមរដ្ឋមន្ត្រី ក៏បានថ្លែងសង្កត់ធ្ងន់ទៅកាន់អង្គពិធីទាំងមូល ពិសេសអ្នកដែលទើបទទួលបានតំណែងថ្មីនៅថ្ងៃនេះថា តំណែងដែលទទួលបានគឺជា កិត្តិយសផង ហើយក៏ជាបន្ទុក និងការទទួលខុសត្រូវផង។
ជាចុងបញ្ចប់ឯកឧត្តមរដ្ឋមន្ត្រី បានផ្តាំផ្ញើដល់មន្ត្រីទាំងអស់ខិតខំបំពេញការងាររបស់ខ្លួនដោយស្មារតីទទួលខុសត្រូវខ្ពស់ ខិតខំរៀនសូត្រអភិវឌ្ឍខ្លួនឲ្យតាមទាន់សភាពការណ៍វិវត្តន៍ថ្មីៗ និងសហការសាមគ្គីពួតដៃគ្នា ដើម្បីសម្រេចបាននូវទិសដៅកំណែទម្រង់របស់ក្រសួងទាំងសម្រាប់ឆ្នាំ២០១៥នេះ ក៏ដូចជាសម្រាប់ឆ្នាំក្រោយៗ ទៀត៕
